НЕЗАДОВОЛСТВО И РЕВОЛТ КОН СЕЛЕКТИВНОТО ИСПЛАЌАЊЕ НА ФИНАНСИСКА ПОДДРШКА

02.7.2020

Вести

Унијата на здруженија на медицински сестри, техничари акушерки стоматолошки сестри предводена од ЗМСТАС – ЗА НАС го пренесува незадоволство и револтот кој го чувствуваат стоматолошките сестри предизвикано од селективното, односно неусогласено исплаќање на финансиската поддршка одобрена од ФЗО на РСМ.

Од меѓусебната комуникација информациите укажуваат дека дел од оваа група на здравствени работници ја добиле оваа финансиска поддршка, а дел не, во зависност од индивидуалното толкување на дописот од ФЗО на РСМ за одобрено користење на финансиска поддршка на здравствените работници.

Сметаме дека селективност меѓу вработените од стоматолошките превентивни и ноќни тимови не треба да има, зошто во времето на најјакото жариште на пандемијата сите ние бевме вклучени и максимално активни и посветени на нашата професија. Сите пациенти беа и се прегледувани без исклучок, во време кога и матичните стоматолошки ординации беа затворени. Затоа финансиската подршка одобрена од ФЗО треба да биде усогласена за сите стоматолошки тимови од превентивната и ноќната служба низ сите Здравствени Домови во нашата земја. Но, не на овој начин со селективна исплата. Незадоволството и револтот меѓу вработените е навистина голем.