Унијата на ЗМСТАС, предводена од ЗМСТАС „ЗА НАС“, зеде активно учество на консултативната средба на тема „Клучни играчи и конкуренција во јавните набавки во здравството“, која се одржа вчера, 18 декември во хотелот „Холидеј ин“ во Скопје, во организација на Центарот за граѓански комуникации.
На средбата, Унијата беше претставена преку свои делегати – претседателот на Унијата, м-р Гордана Бешлиовска и ДМС Емилија Наумовска, член на Извршниот одбор на ЗМСТАС „ЗА НАС“. Нивното присуство претставуваше значаен придонес во дискусијата за подобрување на транспарентноста и интегритетот во јавните набавки во здравствениот сектор.
Целта на средбата беше пред претставниците на релевантните институции и организации да се презентираат наодите од второто истражување за корупциските ризици во јавните набавки во здравството, кое го опфаќа периодот од 2015 до 2024 година. Истражувањето е дел од серија од три планирани анализи, чија крајна цел е изготвување конкретни и применливи препораки за намалување на корупцијата во здравствениот систем.
Консултативниот карактер на средбата овозможи присутните, покрај запознавањето со резултатите од истражувањето, активно да учествуваат со свои согледувања, искуства и предлози кои ќе придонесат кон финализација на истражувањето. Средбата беше затворена за пошироката јавност и медиумите, со цел да се овозможи отворена и конструктивна дискусија.
Унијата на ЗМСТАС предводена од ЗМСТАС „ЗА НАС“ уште еднаш ја потврди својата заложба за активно учество во процесите насочени кон унапредување на здравствениот систем, зајакнување на транспарентноста и заштита на јавниот интерес.
