Во рамки на планираните календарски активности посветени на унапредување на здравствената едукација и поддршката на пациентите, Сојузот на здруженија на лица со дијабетес организираше стручна работилница на тема превенција и менаџирање на кардиоваскуларното здравје и компликациите кај лицата со дијабетес.
Основната цел на работилницата беше унапредување на современите чекори и пристапи во третманот на кардиоваскуларните заболувања, како и навремено спречување на компликациите поврзани со дијабетесот, преку мултидисциплинарен и едукативен пристап.
На настанот учествуваа етаблирани медицински професионалци и предавачи – лекари специјалисти од УК – Кардиологија, УК – Нефрологија и УК – Ендокринологија, кои преку свои стручни излагања дадоа значаен придонес кон продлабочување на знаењата и практичните искуства во оваа област.
Особено значаен придонес на работилницата имаше Унијата на здруженијата на медицинските сестри, акушерки и стоматолошки сестри, предводена од ЗМСТАС „ЗА НАС“, чие активно членство учествуваше во едукативниот процес, дискусиите и размената на професионални искуства. Работилницата претставува важен чекор во континуираниот професионален развој на медицинските сестри и во зајакнувањето на нивната улога во грижата за лицата со хронични заболувања.
.jpg)
Унијата на ЗМСТАС истакна дека ваквите настани имаат суштинско значење за здравствениот систем и за квалитетот на здравствената заштита: „Едукацијата и мултидисциплинарната соработка се основа за унапредување на здравствената грижа и за јакнење на професионалниот капацитет на медицинските сестри. Преку активно учество на вакви стручни работилници, директно придонесуваме кон подобрување на квалитетот на здравствените услуги и кон подигнување на вредноста и безбедноста на пациентите.“
Настанот беше реализиран со заедничка заложба за унапредување на здравствената пракса, јакнење на професионалните стандарди и создавање подобри услови за пациентите, со јасна визија за подобри и поодржливи здравствени решенија во иднина.