На 17 декември 2025 година, во Public Room во Скопје, се одржа промоцијата на регионалниот извештај „Грижа, храброст, промена: лидерство на здравствениот сектор во справувањето со насилството врз жените и девојчињата“, проследена со стручна дискусија за зајакнување на одговорот на здравствениот сектор на насилството врз жените и девојчињата во Северна Македонија.
Настанот ги обедини клучните институционални и меѓународни чинители, меѓу кои Министерството за здравство, здравствени институции, агенциите на Обединетите нации (СЗО, УНФПА, UN Women и УНИЦЕФ), како и претставници на граѓанското општество. Фокусот беше ставен на улогата на здравствениот сектор во превенцијата, раната идентификација, упатувањето, документацијата и обезбедувањето грижа насочена кон преживеаните од родово базирано насилство.
Унијата на здруженија на медицински сестри, техничари и акушерки – ЗМСТАС „ЗА НАС“, активно учествуваше на настанот, препознавајќи ја клучната улога на медицинските сестри и акушерките како прва линија на контакт со жртвите на насилство и како носители на хумана, професионална и етичка здравствена грижа.
На настанот присуствуваше м-р Гордана Бешлиовска, претседател на Унијата на ЗМСТАС „ЗА НАС“, која ја нагласи важноста од системска поддршка и континуирано зајакнување на капацитетите на здравствените работници.
„Насилството врз жените и девојчињата не е само социјален проблем, туку сериозно јавно-здравствено прашање. Медицинските сестри и акушерките имаат незаменлива улога во препознавањето, поддршката и заштитата на преживеаните. Ваквите настани се значајни затоа што отвораат простор за конкретни решенија, подобра координација и јасна национална рамка за дејствување“, изјави Бешлиовска.
Во рамки на настанот беа презентирани клучните наоди од регионалниот извештај, како и резултатите од националната брза проценка за Северна Македонија, кои укажаа на постоечките системски празнини, но и на можностите за унапредување на одговорот на здравствениот сектор преку подобро управување, едукација на кадарот и меѓусекторска соработка.
Унијата на ЗМСТАС „ЗА НАС“ ја потврдува својата посветеност активно да учествува во креирањето и имплементацијата на политики и практики кои ќе обезбедат безбеден, достоинствен и сеопфатен здравствен одговор за сите жени и девојчиња кои се соочуваат со насилство.