ПОВИК ЗА УЧЕСТВО НА 4. МЕЃУНАРОДЕН КОНГРЕС НА МЕДИЦИНСКИ СЕСТРИ „СО ОБРАЗОВАНИЕ ДО ВЛИЈАНИЕ – МЕДИЦИНСКИТЕ СЕСТРИ ДВИГАТЕЛИ ЗА ПРОМЕНИ!“

Со голема чест и задоволство Ве покануваме да земете учество на Четвртиот меѓународен конгрес на медицински сестри кој традиционално ќе се одржи од 3 до 5 октомври 2025 година во хотел „Дрим“ во Струга.

Годинешното мото на конгресот е „Со образование до влијание. Медицинските сестри – двигатели за промени!“, тема која го отсликува значењето на континуираното професионално усовршување и клучната улога на медицинските сестри како лидери и промотори на позитивни промени во здравствените системи и заедницата воопшто.

Конгресот претставува значаен настан од меѓународно значење, каде медицинските сестри, техничари и акушерки ќе имаат можност да разменат искуства, знаења и примери на добра пракса со колеги од земјата и регионот.

Оваа година, во рамки на конгресот, ќе се одржи и Регионалната конференција на Европската организација на специјализирани медицински сестри (ЕСНО), што претставува дополнителна потврда за важноста и релевантноста на овој собир.

Традиционално, ќе биде доделена и Повелбата и одликувањето од прв ред „Славјанка Влахчева“, признание кое се доделува на истакнати поединци за нивниот исклучителен придонес во развојот и афирмацијата на сестринската професија.

Организатор на конгресот е Унијата на Здруженија на медицински сестри, техничари, акушерки и стоматолошки сестри на Македонија (ЗМСТАС), предводена од ЗМСТАС „За Нас“, кои и оваа година со посветеност и ентузијазам ја реализираат оваа важна и престижна професионална средба.

Очекуваме инспиративни презентации, нови партнерства и заеднички чекори кон унапредување на сестринската професија.

Вашето учество е од особено значење за зацврстување на нашата заедничка мисија – посилно, повидливо и повлијателно сестринство.