Унијата на ЗМСТАС, предводена од ЗМСТАС „За Нас“, учествуваше на стручната едукативна работилница посветена на „Менталното здравје на здравствените работници“. Настанот беше дел од тековните активности на Унијата за поддршка и унапредување на здравствениот кадар.
Претседателката м-р Гордана Бешлиовска изјави дека менталното здравје на здравствените работници е чувствителна, но клучна тема која бара континуирано внимание. Таа нагласува дека секојдневниот притисок, стресот и професионалните предизвици ја истакнуваат потребата од системска психолошка поддршка, која е основа за квалитетна здравствена грижа.
Бешлиовска додава дека ѝ претставува чест што може да ги сподели своите стручни сознанија и искуства, истакнувајќи дека Унијата постојано работи на создавање средина во која здравствените работници ќе се чувствуваат ценети и заштитени. Таа упатува искрена благодарност и поздрав до директорот на Болницата Сашо Стошевски, главниот медицински техничар Владимир Симоновски и координаторката за Куманово, Бети Гареска, за нивната поддршка и посветеност во реализацијата на настанот, како и до сите присутни здравствени работници чиј голем одзив ја потврдува важноста на оваа тема.
Унијата на ЗМСТАС продолжува активно да работи на подигнување на стандардите и подобрување на условите во здравството.