Вчера, во организација на Сојузот на здруженија на дијабетичари на Македонија, беше успешно реализирана тркалезната маса на тема „Дијабетесот на работното место – предизвици и можности за здраво и продуктивно работење“, настан кој ја обедини стручната јавност, релевантните институции и граѓанските организации со цел подобрување на условите и поддршката за лицата со дијабетес.
Меѓу говорниците се вброија истакнати имиња од медицинската заедница и институциите, меѓу кои проф. д-р Татјана Миленковиќ, претседател на Научното здружение на ендокринолози и дијабетолози на Македонија, д-р Ирфан Ахмети, директор на Универзитетската клиника за ендокринологија и претседател на Националната комисија за дијабетес, д-р. сци. Олга Лозановска, дијабетолог и пратеник во Собранието на Република Македонија, како и г-дин Димче Велев, претседател на Сојузот на здруженија на дијабетичари на Македонија.
Унијата на ЗМСТАС и ЗМСТАС „За Нас“, предводена од м-р Гордана Бешлиовска, претседател на Унијата и на здружението, ја истакна својата силна и принципиелна поддршка за подобрување на условите на работното место за лицата со дијабет, нагласувајќи ја важноста од пристап до современи медицински помагала, сензори за лицата со дијабет тип 1, како и неопходноста од унапредување на системските решенија кои го олеснуваат секојдневниот живот и работните обврски на оваа категорија граѓани.
Настанот помина во конструктивна и продуктивна атмосфера, при што беа отворени повеќе клучни предизвици – од прашањето за референтни цени на лекови и помагала, до потребата од пообемни истражувања за условите во кои работат лицата со дијабет и пречките со кои се соочуваат.
Во рамките на дискусиите се дефинираа конкретни насоки за понатамошно дејствување, кои вклучуваат иницирање партнерска соработка со јавните здравствени институции и продлабочување на координацијата со националните здравствени власти, со цел создавање поефективни политики и решенија. Унијата на ЗМСТАС предводена од ЗМСТАС „За Нас“ останува цврсто посветена на својата мисија – континуирано да придонесува за достоинствен, здрав и продуктивен работен амбиент за сите лица со дијабетес во Македонија.
