Нашиот тим учествуваше на Вториот конгрес на здравствени работници што се одржа во Лозница, настан кој претставува значајна платформа за размена на знаења, искуства и идеи меѓу колегите од регионот, како и можност за продлабочување на долгогодишната соработка во полето на здравствената нега.
М-р Гордана Бешлиовска имаше поздравно обраќање и одржа предавање на тема „Современ пристап во организацијата на работата на здравствените работници – медицинските сестри“, при што ги истакна современите модели на организација, потребата од континуиран професионален развој и значењето на тимската работа во обезбедувањето квалитетна здравствена нега. Таа воедно беше и активен учесник на панел-дискусијата на тема „Како да се сопре одливот и миграцијата на медицинските сестри од матичните земји и институции“, каде беа разменети мислења и предлози за создавање подобри услови за работа, едукација и мотивација на здравствените кадри.
Во рамките на конгресот се одржаа бројни средби и дискусии со претставници на меѓународни и регионални организации, меѓу кои и претставничката на IFNA, Зорица Кардош, претседателот на ESNO, Адриано Фригановиќ, како и претставници на здружението „Puls od BIH ART“ од Црна Гора, Унијата на медицински сестри и техничари од Клиничкиот центар Ниш, професор д-р Ведрана Вејзовиќ од Универзитетот во Малме, како и претставници од образовните институции на Србија и Хрватска и нивното здружение на медицински сестри.
Програмата беше збогатена со симулациска работилница и голем број стручни предавања кои овозможија размена на најнови практики, иновации и пристапи во здравствената нега. Нашиот тим, составен од медицински сестри од сите нивоа на здравствениот систем, од конесионерството и од образовниот сектор, со гордост го претстави својот придонес и искуство во насока на унапредување на професионалните стандарди и меѓусекторската соработка.
Вториот Конгрес на здравствени работници во Лозница беше уште една потврда за заедничката мисија што ја споделуваме со колегите од регионот – јакнење на професионалниот интегритет, развој на здравствената нега и создавање услови во кои медицинските сестри ќе можат целосно да го покажат своето знаење, посветеност и човечност во служба на пациентот и заедницата.
