Во рамки на големиот јубилеј – 80 години од постоењето на Црвен крст на град Скопје, беше одбележан значаен настан на кој беа доделени Јубилејни плакети и награди „Оскар на хуманоста“ за организации и институции што дале посебен придонес во остварувањето на хуманитарните цели и задачи на Црвениот крст.
Со огромна чест и радост, известуваме дека Здружението на медицински сестри, техничари, акушерки и стоматолошки сестри – ЗМСТАС „ЗА НАС“ е меѓу добитниците на ова значајно признание.
Оваа Јубилејна плакета е симбол на признание за хуманоста, професионалноста и посветеноста на медицинските сестри и сестринството воопшто. Таа е доказ дека нашата работа, нашите вредности и нашата мисија се препознаени и ценети во општеството.
„Колку е гордо и боженствено кога на медицинските сестри им се признава хуманоста во професијата. Колку е убаво кога можеш во тоа име да се заблагодариш! За сестринството! ЗА НАС!“ – изјави м-р Гордана Бешлиовска, претседател на ЗМСТАС „ЗА НАС“, при примањето на наградата.
Ова признание не е само поттик, туку и обврска да продолжиме да ги зацврстуваме мостовите на соработка, да дејствуваме со уште поголема енергија и да даруваме љубов, надеж и помош на сите на кои им е потребна.
Од името на сите членови, упатуваме искрена благодарност до Црвениот крст на град Скопје за доделената плакета и за долготрајната соработка во градењето похумано и посолидарно општество.
ЗМСТАС „ЗА НАС“ – гласот на сестринството!
