Денес, 16 октомври 2025 година, во просториите на НетаВил, се одржа втората едукативна работилница на тема „Ефективна едукација на пациенти – Комуникација за подобро здравје“, во организација на Здружението на медицински сестри, техничари, акушерки и стоматолошки сестри – ЗМСТАС „За нас“, во соработка со Здружението на лекари специјализанти – Скопје.
Настанот беше насочен кон унапредување на комуникациските и едукативните вештини кај медицинските сестри и здравствените работници, со цел подобра и поефективна комуникација со пациентите.
Особено внимание привлече предавањето на м-р Гордана Бешлиовска, која со своето искуство и експертиза преку предавање ја истакна важноста од разбирлива и емпатична комуникација во секојдневната медицинска практика. Таа ги претстави најчестите предизвици во комуникацијата меѓу здравствените работници и пациентите, како и конкретни техники за проверка на разбраноста на информациите и пристап кон различни групи пациенти, вклучувајќи постари лица и пациенти со ниска писменост.
Присутните учесници активно се вклучија во дискусиите и практичните примери, споделувајќи лични искуства и предлози за подобрување на пристапот кон пациентите.
Работилницата се реализираше во рамките на Еразмус+ проектот „Velvet Health“, со поддршка од Европската комисија, кој има за цел промовирање на иновативни пристапи во едукацијата и грижата за пациентите.
Со овој настан, ЗМСТАС „За нас“ уште еднаш ја потврди својата посветеност кон континуираниот професионален развој на медицинските сестри и унапредување на здравствената комуникација во земјата.